سنين الشوق

سنين الشوق

يا سنين الشوق مسيرها تروق وتصفالنا
يا سنين الشوق ليالى الحب جايالنا
ح يروق الحال . . . ننسى الترحال
ويجينا الماضى يستغرب لأحوالنا

ياليالى الغربه بتعاند بقالها سنين
والعمر بيجرى ويسابق سنين جايين
وحنعمل ايه . . . . حنمانع ليه
ودا حال الدنيا حوالينا ماهوش حالنا

ياليالى بدمعنا والله شربنا الكاس
وحاكينا التوهه وياكى لكل الناس
وبقالنا سنين. . . متشوقين
بنسامح مهما فى الغربه بيجرالنا

اللى ابتدا أظلم

مابقاش خلاص ينفع بعدك اكيد ارحم
والخاين الغدار لازم فى يوم يندم
مابقاش رجوع تانى انتى اللى بايعانى
انتى ابتديتى النار و اللى ابتدا أظلم

سنين وانا عايش وكإنى مش عايش
باتمنى اكون موهوم باتمنىاكون باحلم
منسيتش حبك يوم ورضيت ابات مظلوم
علشان ماجيش انهار زيك فى يوم واندم

سنين ح قضيها مالكيش وجود فيها
مالكيش فى بكرة مكان وربنا الأعلم
يحرم عليا كلام يحرم عليا سلام
يحرم عليا رجوع أو قلب يستحرم

آخر سلام

اخر سلام عليا جايلك مادد اديه
يمكن قلبك بيضحك ولا بيكدب عليا
لا ح ترجاك شويه ولا اقولك حس بيا
ولا كنت فلحظه آسف انك بتضحى بيا

انا مش ندمان عليك انا بندم ع اللى كان
كانت صورتى ف عنيك اغلى واقرب مكان
انا اخلصت ف هواك وتعبت كتير معاك
وحاربت الخوف عشانك وماحستش بأمان

انا عشت معاك سنين ماقدرتش اعدهم
ح انساهم من حياتى وح انساك زيهم
زى ما فيه اللى خان ما اكيد فيه الأمان
اللى ينسينى نارك وسنين صدقتهم