الوطن العربي

و زي ما اتربوا ولآدنا

على حضارة أجدادنا

لازم نحقق بأيدينا

حاضر يشرف أحفادنا

بالعلم والإصرار ح نكون

ليه الأمل يفضل مسجون

والدنيا تفضل تواسينا

لازم نرجع أمجادنا

 

العلم كان دايما عربي

لو يوم نطق ينطق عربي

ويقول في بغداد وفى بابل

أصلى . . ويحلف بالعربي

 

لازم نرجع حضارتنا

بيت العرب هو غايتنا

بالعلم والإصرار ح يقوم

ويقول أنا الوطن العربي

 

حلم العمر

 

اوعى تكون صدقت بإنك

حلم العمر اللى اتحدانى

اوعى تكون صدقت غرورك

او فكرت تضحى عشانى

انت مجرد وهم بنيته

كلمة غريبه نطقها لسانى

اوعى تصدق انى بحبك

أو باتمنى ارجعلك تانى

 

انت مجرد خيط اتعلق

بينى وبين قلبى المجروح

لما نسجت عليك احلامى

وكانت وهم بكل وضوح

ياما اتحمل قلبى عشانك

حتى وهو جريح مدبوح

ياما اتمنيتك تسمعنى

قبل ماتيجى وتترجانى

 

انت غرورك غير حالى

وعللا مابينى وبينك سور

عشت فى برج الوهم العالى

سايب قلبى حزين مكسور

جاى دلوقتى بتترجانى

بعد ماكنت لعينى النور

بعد ماكنت الغالى عليا

تجنى عليا وتبقا الجاني