في حصة التعبير

ع الدكة اللى جنبي في حصة التعبير

كانت عبير ..

بترقص على شرابها حبة كور

وأجمل حَور .. مغطياه نضاره بيضه

وتوكه وشوية بنسّ ..

نايمين على توب الحرير شعرها

وشعاع من الشمس .. لافف دهب على وشها

والا الإيدين .. دى مش إيدين

ده شمع أبيض ماسك قلم

تُقل الحواجب ..

عاملها واحده ست بيت

اما القوام ..

نخل عالى وسط غيط

نظرة عينها .. تكسف جبل

نَفسهَا عنبر..

والشفايف مخلوقين بيحبوا بعض

عبير .. رئيسة فصلنا

أمنا .. مسحت كتير دمعنا

عبير .. ملاك .. رسول .. شاعر

ناي ودف وسلاميه

عود و رِقْ وسمسميه

عبير ..

أول حكاية كتبتها .. في حصة التعبير.