عامية يا عم
شعبية يا خال
ايقاعها خيال
ايقاع لحورية مصرية
ماشية بخلخال
تتمشى ساعة عصرية
ع النيل بدلال
بتغطى كسوفها بملاية
بتورى جمال
بنوتة شقية ولعبية
سحرها أشكال
أوقات فى شقاوة الحجابية
فى ساحة الشعر
عزق الأبنودى فى غيطانه
يرويها بصبر
ترنيمة روح عبد الفتاح
فى حالة سكر
موواويل تسبيحه فى ليل عاشق
يتليها تزود فى ايمانه
فيها شوق درويش لطلوع فجر
وبلدنا تقوم قبل أدانه
فيها قوة كلمة على لسان سعد
يعلن للعدو مدى عصيانه
فيها غربة بيرم فى مكانه
وبحث جاهين عن عنوانه
وحنين فى بليغ لأوطانه
بيحرك فى ايديه الريشة
أنغام مزروعة فى كيانه
صحيح كان فلتة فى زمانه
فبها وصف سرور لحبيبة
تخونه تزود فى جنانه
فيها عشق فؤاد لتراب بلده
يعشقها تزود دوبانه
فى صنايعى وفنان ومداوى
أغنية وعايشة فى وجدانه
فيها صرخة نجم فى ليل سجنه
ما ينخ فى ليلة لسجانه
والكلمة يقولها فى تعويذة
بتدوب قيده وقضبانه
ومنيب ياما كان فى النوبة
يفارقها ما تصيبه التوبة
عن حبه ليها اللى بيروى
شجر الحنية فى شريانه
فيها عشق منصور للنيل
يسهر ويقوله فى مواويل
فى كلام يتسرسب ويسابق
النيل فى رحيله و جريانه
فيها برقة ضى فى عين لمنير
بيغنى لفستان بنوتة
منشور على الشط التانى
ونظرة شوق فى عنين شابة
ورعشة حب فى قلب أسير
وكلام عن سكة وعن مشاوير
مولود بدرى قبل أوانه
عامية يا عم الشيخ سيد
تغريه يدندن ألحانه
صوت وردة يبعتر فى حنانه
يطرح جوة الروح تفاريح
بتنسى الواحد أحزانه
عامية تروح زى ما بتروح
على حسب وداد القلب ما حب
بترد الروح....والمعنى
تنهيدة وطالعة من القلب
يلاقيها الواحد من غير قصد
لازمة فى أغنية على لسانه
عامية يا عم ...
شعبية يا خال.
الثلاثاء ٢٠ حزيران (يونيو) ٢٠٠٦
