ينت الجيران
الساكنه جوا حينا
كانت زمان
تلعب وتجري زينا
لكن ..خلاص
انسد باب
وبقت حكاية من سراب
حتي اللي كان
بيحكي زمان
نفس الحكاية راح وغاب
حتى العيال
مسكوا الحبال
وقعدوا يشدوا يشدوا
لحد منفسهم اتطقع
ولاحتى نص شعاع
من الشمس
ع عتمه وششهم سطع
نسينا بنت الجيران
لا منسنهاش
بس من حقنا ع الدنيا
انها تتعاش
حتى لو طوابين العيش
والفلاحين الغلبانين
ملقوش في جيوبهم
ولا تعريفة
عشان يشتروا خيش
يداري كل لطعه سوط
زمان من ايد جبروت
وملقوش اي فاكهه ياكلوها
غير من شجر التوت
اصله ببلاش
والشجر كتير
من غير غفير
ياه كل مرة
انسى اقول بنت الجيران
واخش علطول
في المأسي بتاع زمان
ياه ع الزمان
سيبونا من بنت الجيران
واسمعوا القصة دهيه
وقولولي من فينا الضحية
الشوراع ع والبيوت
والحواري الضيقة
وكل يوم واحد بيموت
والترب متسيقه
والحانوتي مبيسألش
حتى لو بيسأل
المهم انه ميت
والمهم انه ادفن
حتى لو وسط العفن
حتى لو من غير كفن
ابض فلوس
حتى لما دفن عليوة
عارفين قصته
لا متعرفهاش
انتوا متعرفوش
حاجة مشفتهاش
الحاجة دهي
بكل تحيه
الكرامه مع الفقر الشديد
ورغم كده
عليوة كان عنيد
مرضاش يرتشي
ويبيع ذمته
اصل ذمة من حديد
اتقتل وده اقل واجب
مع اي شريف
عاش طول يومه
انه يجمع حق رغيف
نسج احزانه جنب كرامته
وهو ده توبه
اللي ماشي متدارى بيه
وياعني ع عليوة
ياعني عليه
اكملكم
مات عليوة تحت عجلات الشيطان
اتفرم والدم ناشع منه مغلي م الفوران
دمه حامي
مرضاش يتقال عليه حرامي
مات شريف
وعاش شريف
المشكلة لما مات
ملقوش معاه اي حاجة تدل عليه
والمشكلة الاكبر
انه في جيبه2 جنيه
ده اللي كان بيتحصل عليه
من عمله وقوت ايديه
ليه وعيالة وولاده
ولبنت الجيران
مهي هي دي بنته المسكينه
ملقوش حق الترب
وكمننا عرب
بنتخانق ع الرياء
مش لشهامه
لأ للغباء
كل واحد قال انا هدفن عليوه
لحد ماعليوة مدفنش
بنته ماتت من القهر
والحواري المسدوده في عينينها
ولا كلاب السكك
اللي من زمان مستننها
اصل جمالها فوق البال
بس شريفة زي ابوها
ميتخفش عليها
من الشياطين المترصدين
اللي شافوا وسط جمالها
فقر وقحط وعوزة مال
جمعت من اصحاب الخير
بعد ماقعدت ياعيني كتير
اكتر من سابعين ساعه
وطول غيبتها
كل واحد باشاعه
اكيد باعت جتتها من اجل المال
وعشان تجيب كسوتها
وتدفن ابوها
لكن رجعت بنفس الكسوه
ومعاها اخوها
وشالوا ابوهم
راحوا دفنوه
هي دي بنت الجيرات
اللي كبرت شبت
حلفت قسمت
اني اصون العهد يابا
عمري مابيع لو حتى بأيه
انت مفرطش في مبدأ
وعمر ما شرفي هفرط فيه
وانتهت خلاص
حكايتها
وحكاية بتتكرر
وتكون دي نهايتها
بس بشوية تعديلات
وشوية تفريطات
الا بنت الجيران
اللي ساكنه جنبنا
الثلاثاء ٣ تموز (يوليو) ٢٠٠٧
