المركب مش لاقيه المينا

المركب مش لاقيه المينا

وقلوبنا غرقانه حزينه

في آلمها اللي معشش فيها

والآها جوانا دفينه

المركب تايهه على مرسى

مش قادره في يوم توصل بينا

البر ليه عنا بيبعد

والضعف ليه بينهش فينا

الحُب في قلوبنا بيدبل

والدمعة بتموت في عنينا

الجرح جوانا بيكبر

واليأس يجيبنا يودينا

لمطرح ما كُنا بنحلم

بعديها بقسوه بيعمينا

أشباح الخوف بتطاردنا

وفـ أحضانها بتخبينا

ولسانا مسجون م الصدمه

معقوله لكلامنا نسينا

الرحلة صعبة مش سهلة

زي ما رحُنا زي ما جينا

بتاخدنا الأيام ليه من الفرحه

على شط الأحزان ترمينا

لا خطوة منها بنتقدم

في الأخر بنلوم بعضينا

والأشواك في زهورنا بتجرح

وبتخنق فراشتها إيدينا

أحلامنا يا ناس هتموت منا

ونلوم الحظ ونفسينا

لو كنا تعبنا في يوم ليها

مكانشي دا هيحصل لينا

لو كُنا نطقنا بكلامنا

المركب كات لقيت مينا

المركب كات لقيت مينا