مئذنة ورا مئذنة،
يكمل الآذان
والصبح لما دنا،
خيوط الفجر تبان
نبدر فى أرضك حب،
تدينا خير وأمان
أفديكى لو تندهى،
وقلبى كله إيمان
الغالى ليكى يهون،
يازينة الأوطان
قوم إدفع تمن الحرية
الوقت مش وقت الكلام
ولاعادش ينفع إستسلام
الحسبة واضحة كاملة وتمام
زادت ومين قادر ينام
قوم إدفع تمن الحرية
كل الأماكن متبهدلة
وبأيديك قيود متغلغلة
وهدوم عليك متهلهلة
وأمل أبوابه متقفلة
قوم إدفع تمن الحرية
نهشوا فى لحمك فى كل حى
وباعوك برخص الغاز والمى
تايه و مبقاش لك زى
فرجة للرايح والجاى
قوم إدفع تمن الحرية
مين ينسى غدر العبارة
وهروب صاحبها بقدارة
واللى ساعدوه بشطارة
والعدل فين، هات لى أمارة
قوم إدفع تمن الحرية
علشان تأكل لقمة عيش
تقف طوابير وذل وطلطيش
كادح وتعبان على مفيش
وقدام عنيك لعب وتهبيش
قوم إدفع تمن الحرية
مسئول كبير عايش سلطان
جاب جوه جوفك السرطان
وماية مجارى و القطران
والحق ضاع بكدب ونكران
قوم إدفع تمن الحرية
وتمن النضافة خلاها إجبار
وبقت الزبالة لحد الدار
فين العربية أم حمار
ترحمنا بعد العقل ما طار
قوم إدفع تمن الحرية
وف توشكى ألف سؤال ودليل
إهمال وجهل وكلام تهليل
وضاع الحساب وسط التضليل
دى خسارة توزن كام ميت فيل
قوم إدفع تمن الحرية
لو يوم نطقت، ع السجون
يا ترضى بفسادهم فين ما يكون
يا تبقى عاصى خائن مجنون
وكلاب تلاحقك وأنياب وعيون
قوم إدفع تمن الحرية
يا تعيش بكرامة، يا إما تموت
وكفاية ذل وخيبة وسكوت
لا تخاف من هووووه هوه ولا نبوت
دى القوة مش بعلو الصوت
قوم إدفع تمن الحرية
فى الخمسينات قالوا دى ثورة
وديمقراطية بمناورة
دلوقتى قالوا عليها عورة
ما كلكم شهرى بدورة
قوم إدفع تمن الحرية
تشوف العجب فى الانتخابات
هنا بلطجية و هناك باشوات
ضامنين مكان له، ناجح بالذات
بتزوير وغش فى الورقات
قوم إدفع تمن الحرية
سنين طويلة و بيزيدوا
خاضع وبتبوس فى أيده
محسوب يا عينى على عبيده
وإن جيت للحق، أنت سيده
قوم إدفع تمن الحرية
بيقول عليك جاهل عايب
والوعى عندك لساه غايب
وفى حزبه عيل أو شايب
بالعافية بيخلوه نايب
قوم إدفع تمن الحرية
حجز لابنه مكان قدام
وكتب له أسمه مع الحكام
الحكم بقى ملك لأقزام
من كل صنف تعالب ونعام
قوم إدفع تمن الحرية
وآخر نوادره بحكمته قال
يا عسكرى، يا إما محال
ستين سنه وشايفين الحال !
ومين رئيس من الكرسى إنشال
قوم إدفع تمن الحرية
إشتقنا نبقى صحيح أحرار
وبديموقراطية نقوم نختار
ياقلب غضبان على الأشرار
غضبك يخلى الضلمة نهار
قوم إدفع تمن الحرية
الثلاثاء ١٣ تشرين الأول (أكتوبر) ٢٠٠٩
